Այսօր ՀՀ Աժ Գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նիստի ժամանակ «Բարգավաճ Հայաստան» խմբակցության պատգամավոր Իվետա Տոնոյանը հայտնել է, որ «Նախադպրոցական կրթության մասին» ՀՀ օրենքում փոփոխություններ կատարելու մասին նախագծում առկա են տառասխալներ:
«Կան բազմաթիվ տառասխալներ, շարահյուսական սխալներ, լատինատառ կետադրական նշաններ… կարծում եմ, որ գոնե առնվազն ԿԳՄՍՆ-ի կողմից ներկայացված օրենսդրական նախաձեռնությունը այդպիսին չպիտի լինի»,- դիմելով նախարար Արայիկ Հարությունյանին` ասել է Տոնոյանը:
Ի պատասխան` ԿԳՄՍ նախարարը ասել է, որ անձամբ կարդացել է ԱԺ կայքում տեղադրված նախագծի վերջնական տարբերակն ու որևէ սխալ այնտեղ չի նկատել:
AntiFake.am-ը ստուգել է օրենքում փոփոխություններ կատարելու մասին նախագիծը` պարզելու` արդյո՞ք Իվետա Տոնոյանի հայտարարությունը համապատասխանում է իրականությանը:
Օրենքի նախագծի տեքստը ուսումնասիրելիս պարզեցինք, որ ԲՀԿ-ական պատգամավորը ճիշտ է: Արայիկ Հարությունյանը, փաստորեն, այդքան էլ լավ չի տիրապետում հայոց լեզվին` չնկատելով առկա սխալները: Նախագծի տեքստում առկա են գերազանցապես կետադրական, շարահյուսական, տառատեսակային սխալներ, վրիպակներ, ոչ հայերեն չակերտներ:
Նախագծի «Հիմնավորում» բաժնում սխալներն առավել ակներև են:
Նախագծի և հիմնավորման պաշտոնական և AntiFake.am-ի կողմից ստուգված տարբերակն՝ այստեղ։
Մի քանի կոպիտ սխալներ` ստորև.
Հեղինակ՝ Մելինե Հայրապետյան