ՄԵՐ ՄԱՍԻՆ

2018 թվականի իշխանափոխությունից հետո Հայաստանում տեղի ունեցող իրադարձությունների առանցքը կազմում են կեղծ լրատվությունը, քարոզչությունը և մանիպուլյացիան։ Պայմանավորված այն հանգամանքով, որ գոյություն չուներ փաստերի վերհանման, կեղծիքների, կեղծ օգտահաշիվների բացահայտման, քաղաքական պրոպագանդայի՝ անկողմնակալ լրատվությունից տարանջատման որևէ իրական հարթակ՝ «Քաղաքացիական գիտակցություն» և «Քաղաքացիական համերաշխություն» ազատական ՀԿ-ները 2019 թվականի հունվարին հիմնադրեցին և մարտից գործարկեցին AntiFake.am կայքը որպես անկախ և անկողմնակալ զանգվածային լրատվության միջոց, որը զբաղվում է հանրային նշանակության կարևոր հարցերի վերաբերյալ փաստերի ստուգմամբ և տեղեկատվության տրամադրմամբ։

AntiFake.am կայքը ստուգում է ՀՀ վարչապետի, ՀՀ Կառավարության անդամների, ՀՀ Ազգային ժողովի պատգամավորների, այլ հանրային գործիչների, քաղաքացիական դաշտի ներկայացուցիչների, լրատվամիջոցների հայտարարություններն ու գործունեությունը և գնահատում է փաստերի հիմնավորվածությունն ու ճշգրտությունը։

Կայքը հասանելի է երեք լեզուներով՝ հայերեն, ռուսերեն և անգլերեն։

AntiFake.am-ի հիմնական նպատակներն են՝

• Օգնել հասարակությանը բացահայտել ճշմարտությունը հանրային քաղաքականության ոլորտում,
• Հասարակությանը տրամադրել ստուգված և ճշգրիտ տեղեկատվություն,
• Բարձրացնել քաղաքական գործիչների հաշվետվողականությունը և գործունեության թափանցիկությունը,
• Նպաստել հանրային քաղաքականության մեջ փաստերի վրա հիմնված գործունեության արմատավորմանը։

AntiFake.am-ը իր ընթերցողին փաստերով ստուգված տեղեկատվություն է տրամադրում հետևյալ ոլորտներում՝

• Ներքին քաղաքականություն,
• Արտաքին քաղաքականություն,
• Տնտեսություն,
• Հասարակություն,
• Իրավունք,
• Արցախ:

AntiFake.am-ը բացահայտում է չկատարված խոստումները, կեղծ լուրերը, մանիպուլյացիաները, պրոպագանդան, հրապարակում է օդում կախված լուրերը և ստուգում դրանց հավաստիությունը։

AntiFake.am-ը փաստերը ստուգում է՝ օգտվելով պաշտոնական աղբյուրներից, հարցազրույցներից, զեկույցներից, տեղեկանքներից, ինչպես նաև՝ AntiFake.am կայքի միջոցով արվող հարցումներից ստացված պատասխաններից։

AntiFake.am-ն ունի փաստերի գնահատման երկու սանդղակ.

• Հանրային գործիչների խոստումները գնահատվում են նրանց համար մշակված հատուկ սանդղակով՝ հետևյալ գնահատականներով՝ «կատարել է», «ընթացքում է», «պարզ չէ», «չի կատարել»։
• Տեղեկատվության հավաստիությունը ստուգվում և գնահատվում է հետևյալ գնահատականներով՝ «ճիշտ է», «մասամբ ճիշտ է», «պարզ չէ», «սուտ է»։

AntiFake.am-ը իր ընթերցողներին հնարավորություն է տալիս կայքի խմբագրությանն ուղարկել հանրային նշանակության կարևոր փաստեր, որոնք ըստ կարևորության ստուգվում և հրապարակվում են կայքում։

AntiFake.am-ը չի բացառում, որ ստուգված և հրապարակված փաստերում կարող են լինել փոքր անճշտություններ, որոնց մասին մեր ընթերցողը կարող է հայտնել էլեկտրոնային փոստի միջոցով։

AntiFake.am-ն իր անկախությունն ու անկողմնակալությունը պահպանելու համար ֆինանսավորվում է իր ընթերցողների նվիրաբերությունների միջոցով և այլ օրինական աղբյուրներից։

AntiFake.am կայքի աշխատակազմում սուտը և մանիպուլյացիաները չհանդուրժող  երիտասարդներ են։