Այսօր՝ մարտի 31-ին, հրապարակվել էր ՀՀ պարետ Տիգրան Ավինյանի թիվ 25 որոշումը Չարենցավան համայնքում, բացառությամբ Ֆանտան վարչական բնակավայրի, կիրառվող սահմանափակումների վերաբերյալ:
Սահմանափակումներ ուժի մեջ էին մտնելու մարտ 31-ին, ժամը 18:00-ից մինչև ապրիլի 5-ը՝ ժամը 23:59-ը:
Այս որոշումը պատճառաբանվում էր Չարենցավանում կորոնավիրուսի վարակվածության մասշտաբի մեծությամբ:
Սակայն Կոտայքի մարզպետ Ռոմանոս Պետրոսյանը ավելի ուշ հայտարարել է, որ որոշումը «տեխնիկական սպրդման հետևանք է»: «Խնդրում եմ ընդունել ի գիտություն՝ քիչ առաջ հրապարակված պարետատան որոշումը տեխնիկական սխալի սպրդման արդյունք էր, որի առիթով հայցում ենք ձեր ներողամտությունը»:
«Տեխնիկական սխալի պատճառով է եղել որոշումը, չպետք է հրապարակվեր։ Մենք պատրաստում ենք տարբեր սցենարներ, որ որոշակի զարգացումների դեպքում, հնարավոր է, ինչ-որ մի տեղ փակվի։ Որոշումը տեխնիկական սխալի պատճառով է հրապարակվել։ Այս պահին նման որոշում չկա», - Aysor.am-ի հետ զրույցում ասել է ՀՀ փոխվարչապետ, պարետ Տիգրան Ավինյանի խոսնակ Վահան Հունանյանը։
Որոշումը չեղյալ համարելու մասին պարետ Տիգրան Ավինյանի որոշումը արդեն իսկ հրապարակված է:
Ստացվում է, որ «տեխնիկական սպրդման» արդյունքում կառավարությունը՝ ի դեմս պարետատան, խուճապ է ստեղծում սահմանափակումներին անպատրաստ Չարենցավանի և հարակից համայնքների բնակիչների շրջանում: Այնուհետև հակասում է ինքն իրեն՝ որոշումը չեղյալ համարելով:
Հեղինակ՝ Մելինե Հայրապետյան