«Քաղաքացիական գիտակցություն» ազատական ՀԿ նախագահ, AntiFake.am կայքի հիմնադիր Նարեկ Սամսոնյանը ֆեյսբուքյան ուղիղ եթերում անդրադարձել է ընտանիքի անդամների` մեքենայում դիմակ կրելու պարտադիր պայմանին:
Սամսոնյանը նշել է, որ անհրաժեշտություն չի տեսնում, թե ինչու միևնույն ընտանիքի անդամները պետք է պարտադիր դիմակ կրեն փակ տարածքներում:
Նարեկ Սամսոնյանը ուղիղ եթերի ընթացքում կոչ է արել ոստիկանությանը կանգնեցնել իր մեքենան և տուգանել` միաժամանակ քննարկելով միևնույն ընտանիքի անդամներին փակ տարածքում դիմակ կրելու անհրաժեշտությունը:
Անդրադառնալով կորոնավիրուսի վարակիրների` այսօրվա ռեկորդային թվին` Սամսոնյանը նշել է. «452 նոր դեպք է գրանցվել հպարտ Հայաստանում` հպարտ կառավարության կողմից կառավարվող երկրում: Ըստ էության` մենք ունենք ռեկորդային թվով՝ 7113 վարակված այն պարագայում, երբ հարևան Վրաստանում ընդամենը 731 է»:
Սամսոնյանը համոզված է. Վրաստանի Հանրապետությունը իր օրինակով ապացուցեց, որ հնարավոր է ունենալ լավ կառավարում և խուսափել նման աղետալի վիճակից: Նա միաժամանակ նշել է, որ Հայաստանում նման իրավիճակի ստեղծման պատճառը իշխանությունների կողմից համավարակը ծաղրելն ու լուրջ չընդունելն է:
«Սա իշխանությունների ապիկարության արդյունքն է, անլրջության, հիմարագույն մտածելակերպի և ցածրագույն ունակությունների հետևանքն է»,- հավելել է Սամսոնյանը:
AntiFake.am-ի հիմնադիրը նշել է, որ դիմակները կորոնավիրուսից չեն պաշտպանում, իսկ այս գործելաոճով իշխանությունները փորձում են պատասխանատվությունից խուսափել:
«Դուք բերել եք, ողջամտությունից կիլոմետրերով զուրկ մի քանի կանոն եք մտցրել, որը որևէ տրամաբանության չի ենթարկվում»,- ասել է Սամսոնյանը:
Սամսոնյանը նշել է, որ իշխանությունները կանոնները օգտագործում են բացառապես իրենց ընդդիմախոսների դեմ:
«Դուք տապալվել եք, դուք գնալու եք` կորոնավիրուսի մահերը ձեր վզին վերցրած: Դուք կորոնավիրուսով սպանեցիք մարդկանց Հայաստանի Հանրապետությունում: Եվ անգամ այս պարագայում դուք չեք գիտակցում պահի լրջությունը և միայն ընդդիմախոսների վրա տարածելով` այս կանոնները փորձում եք այս հարցը լուծել: Դուք վաղուց հատել եք ողջախոսության սահմանները ինքներդ»,- ասել է Սամսոնյանը:
Սամսոնյանը կոչ է արել իշխանություններին կանոններ հաստատելուց առաջ մտածել այդ կանոնների կիրառելիության և ողջամտության մասին. «Այսօր դուք հատել եք այնպիսի սահման, որը Հայաստանի Հանրապետությանը զրկում է առողջապահական անվտանգությունից»:
Սամսոնյանը նաև տեղեկացրել է, որ ոստիկանությունը չի կանգնեցրել մեքենան, և որևէ հիմնավորում չի ներկայացրել, թե ինչու պետք է ամուսինները դիմակ կրեն մեքենայում:
«Հիմա դուք (իշխանությունները - խմբ.) Հայաստանում Հիրոսիմա-Նագասակի եք անում: Դուք ատոմային ռումբ եք գցել ձեր ապիկարությամբ Հայաստանի Հանրապության վրա: Դուք եք բացառապես մեղավոր, չփորձեք մեղադրել մարդկանց»,-ասել է Սամսոնյանը:
«Դուք (իշխանությունները - խմբ.) այս ժողովրդին հետևողականորեն սպանել եք ու սպանում եք ձեր ապիկարությամբ»,- եզրափակել է Սամսոնյանը:
Մանրամասները տեսանյութում.
Աղբյուր՝ AntiFake.am