ԱՄՆ Օրեգոն նահանգի Պորտլենդ քաղաքում ձերբակալվել է անկարգություններին մասնակցած ավելի քան 20 անձ: Այս մասին հայտնում է TASS լրատվական գործակալությունը՝ հղում անելով ոստիկանության քաղաքային բաժնի կայքում շաբաթ օրը տեղադրված հաղորդագրությանը:
«Ոստիկանությունը օգոստոսի 7-ի երեկոյան ժամերին և օգոստոսի 8-ի վաղ առավոտյան ձերբակալել է 24 անձի», - ասվում է հաղորդագրության մեջ: Բախումների ժամանակ վիրավորվել է Օրեգոնի պարեկապահակային ծառայության աշխատակիցներից մեկը:
Ոստիկանությունը նշել է ձերբակալվածների անունները, որոնցից ամենաերիտասարդը 20 տարեկան է, իսկ ամենամեծը՝ 49 տարեկան: Նրանց մեղսագրվում է իրենց գործառույթներն իրականացնող իրավապահ մարմինների աշխատակիցների վրա հարձակվելու, ձերբակալությանը դիմադրելու և դաշնային կառույցի տարածք մուտք գործելու արարքները: Հարձակվողներն օգտագործել են քարեր, շշեր, սառեցված ձվեր, ինքնաշեն պայթուցիկներ, ինչպես նաև լազերային ցուցիչներով փորձել են կուրացնել իրավապահներին:
Բողոքի ցույցերը, որոնք ուղեկցվում են անկարգություններով, Պորտլենդում շարունակվում են ավելի քան 78 օր: Ավելի վաղ ամերիկյան վարչակազմի որոշմամբ քաղաք էին ուղարկվել իրավապահ մարմինների դաշնային ստորաբաժանումների, այդ թվում ՝ ԱՄՆ-ի Ներքին անվտանգության նախարարության աշխատակիցներ:
Մայիսի վերջին Մինեսոտա նահանգի Մինեապոլիս քաղաքում աֆրոամերիկացի Ջորջ Ֆլոյդի մահվանից հետո ԱՄՆ-ի մի շարք քաղաքներում սկսվեցին զանգվածային բողոքի ցույցեր և անկարգություններ: Ոստիկանության աշխատակիցները Ֆլոյդի ձերբակալության ժամանակ կիրառել էին խեղդող վարժաձև, ինչից հետո Ֆլոյդը մահացել էր հիվանդանոցում: Գործողությանը մասնակցած բոլոր չորս իրավապահները հեռացվել են համակարգից, նրանց մեղադրանք է առաջադրել:
Կարգուկանոնը վերականգնելու համար տեղի ոստիկանությանը միացել է ԱՄՆ Ազգային գվարդիան: Մոտ 40 քաղաքում՝ ներառյալ Վաշինգտոնում և Նյու Յորքում, հայտարարվել է պարետային ժամ:
Աղբյուր՝ AntiFake.am