Բելառուսում բողոքի ցույցերի ընթացքում ձերբակալվել է մոտ 3 հազար մարդ: Այս մասին TASS լրատվական գործակալությանը հաղորդել է հանրապետության ՆԳՆ մամուլի քարտուղար Օլգա Չեմոդանովան:
«Ամբողջ երկրում ընդհանուր առմամբ ձերբակալվել է շուրջ 3 հազար մարդ չարտոնված զանգվածային միջոցառումներին մասնակցելու համար: Ձերբակալածների թիվը Մինսկում կազմում է մոտ հազար, իսկ հանրապետության այլ շրջաններում՝ երկու հազարից ավելի», - ասել է նա:
Օգոստոսի 10-ի գիշերը բողոքի ցույցեր են անցկացվել 33 բնակավայրերում: «2020 թվականի օգոստոսի 9-ի գիշերվանից մինչև օգոստոսի 10-ը երկրում 33 բնակավայրերում հայտնաբերվել են քաղաքացիների հավաքների օջախները ընտրատեղամասերի տարածքում և կենտրոնական հրապարակներում», - ասել է Չեմոդանովան:
«Անհրաժեշտ է նշել, որ իրավախախտների նկատմամբ ոչ մի ռազմական զենք չի կիրառվել: Զոհեր չկան», - նշել Բելառուսի ՆԳՆ մամուլի քարտուղարը:
Հիշեցնենք, որ օգոստոսի 9-ին Բելառուսում կայացած նախագահական ընտրությունները երեկոյան ժամերին վերածվեցին գործող նախագահ Ալեքսանդր Լուկաշենկոյի հակառակորդների զանգվածային բողոքների և Մինսկի կենտրոնում իրավապահ ուժերի հետ լուրջ բախումների: Բախումները տևեցին գրեթե չորս ժամ: Իրավապահ մարմինների աշխատակիցները օգտագործել են հատուկ միջոցներ, ներառյալ՝ ջրցաններ, լուսային նռնակներ և ռետինե փամփուշտներ: Արդյունքում կան վիրավորներ և ձերբակալվածներ:
Երկուշաբթի օրը հրապարակված ԿԸՀ-ի նախնական տվյալների համաձայն՝ Լուկաշենկոն հավաքել է ձայների 80.23% -ը, Սվետլանա Տիխանովսկայան` 9,90%: Մյուս երեք թեկնածուները ստացել են 2%-ից քիչ ձայներ:
Աղբյուր՝ AntiFake.am