Եվրոպայի խորհրդի խորհրդարանական վեհաժողովի դիտորդներն Ադրբեջանին և Հայաստանին կոչ են արել անհապաղ դադարեցնել ռազմական գործողությունները և վերադառնալ երկխոսության:
«Մենք ծայրահեղ մտահոգված ենք Հայաստանի և Ադրբեջանի միջև ռազմական գործողությունների մեկնարկով և դրանց սրմամբ, որոնք սպառնում են տարածաշրջանային կայունությանը: Մենք խորապես ցավում ենք զինվորականների և քաղաքացիների շրջանում արձանագրված կորուստների համար, որոնց մասին երկու կողմերն էլ հայտնել են»,- իրենց հայտարարության մեջ նշել են շվեդ Բորիանա Օբերգն ու ֆինն Կիմո Կիլյունենը և Ադրբեջանի հարցով համազեկուցողներ ավստրիացի Շտեֆան Շեննահն ու բրիտանացի Ռոջեր Գեյլը:
«Կոչ ենք անում կողմերին անհապաղ դադարեցնել ռազմական գործողությունները, թուլացնել լարված իրավիճակը և վերադառնալ բանակցությունների սեղանի շուրջ Մինսկի խմբի ձևաչափում: Բացի այդ, մենք կոչ ենք անում Եվրոպայի խորհրդի անդամ պետություններին զերծ մնալ ցանկացած գործողություններից կամ քննարկումներից, որոնք կարող են նպաստել լարվածության ավելացմանը և անկայունությանը այս տարածաշրջանում: Մենք կրկին հայտարարում ենք, որ ԼՂ հակամարտության խաղաղ կարգավորմանն այլընտրանք չկա»,- ընդգծել են մշտադիտարկողները:
«Ինչպես մեր համատեղ հայտարարության մեջ՝ 2020-ի հուլիսին նշել ենք, երբ բախումներ տեղի ունեցան հայ-ադրբեջանական սահմանի երկայնքով, մենք կարևորում ենք Եվրոպայի խորհրդի անդամ պետությունների ստանձնած այն հստակ պարտավորությունը, որ նրանք պետք է լուծեն իրենց միջև առկա հակամարտությունները միայն խաղաղ միջոցներով»:
«Վեհաժողովը պատրաստ է խորհրդարանական մակարդակով նպաստել խաղաղ բանակցությունների համար բարենպաստ միջավայրի ստեղծմանը»,- եզրափակել են համազեկուցողները:
Խորհրդականները նաև ուշադրություն են հրավիրել «Եվրոպայի խորհրդի անդամ պետությունների պարտավորվածություններին՝ իրար միջև հակամարտությունները միայն խաղաղ ուղիներով կարգավորելու հարցով»:
Աղբյուր՝ AntiFake.am