Դեկտեմբերի 7-ին Երևանի ավագանու «Լույս» դաշինքի անդամ Թեհմինա Վարդանյանը հրապարակում էր արել այն մասին, որ Ավան վարչական շրջանում` Խուդյակով 188/2-ի հարևանությամբ, ապօրինի շինարարություն է կառուցվել: Վարդանյանը գրել է. «Ապօրինի շինարարությունն այ այսպես է լինում. մայթը զավթել և փակել նույնիսկ հետիոտնային անցումը…Ասում են՝ փոխթաղապետը ձեռք է բերել պայմանավորվածություն. մենք քեզ շին. թույլտվություն, դու մեզ մի քանի տարի շաուրմայանոց աշխատեցնելու տարածք։ Պահանջում եմ անմիջապես քանդել ապօրինությունը, և ինչպես քաղաքապետն է հաճախ ասում, մայթը վերադարձնել քաղաքացիներին։»:
Ստեղծված իրավիճակի շուրջ տեղեկատվություն ստանալու նպատակով AntiFake.am-ը հարցում էր ուղարկել Երևանի քաղաքապետարանին, որտեղից տեղեկացրել են, որ ապօրինի շինությունն ապամոնտաժվել է:
► Նախկին «հեղինակություններին» փոխարինելու են եկել քրեական անցյալ ունեցողները։ Ի՞նչ է կատարվում Ավան վարչական շրջանի աշխատակազմում
► Ինձ ոչ թե նշանակել են Քոչարյանի ասուլիսը տապալելու համար, այլ գնահատել են իմ ունակությունները: Ի՞նչ է գրում մամուլը Շենգավիթ վարչական շրջանի ղեկավարի մասին
AntiFake.am-ին տրամադրվել է նաև ապօրինի շինարարության համար կազմված վարչական իրավախախտման արձանագրության պատճենը, որի համաձայն՝ քաղաքացի Սերիկ Մելքումյանի կողմից առանց համապատասխան քաղաքաշինական փաստաթղթերի իրականացվել է սեփականության իրավունքով պատկանող բնակելի տանը կից համայնքային սեփականություն հանդիսացող հողամասի վրա քարե շարվածքով պատի կառուցում, մետաղապլաստե նյութից վիտրաժի տեղադրման շինարարական աշխատանքներ, ինչը արձանագրությամբ համարվել է ՀՀ «Վարչական իրավախախտումների վերաբերյալ» օրենսգրքի 154-րդ հոդվածի 1-ին մասի 3-րդ պարբերության խախտում (Հողօգտագործման իրավունք չունեցող անձանց կողմից պետությանը և համայնքներին սեփականության իրավունքով պատկանող հողամասերի վրա շենքեր և շինություններ ինքնակամ կառուցելը), որն առաջացնում է տուգանք 400.000 ՀՀ դրամի չափով։
Ինչ վերաբերվում է ապօրինի շինարարության և Ավանի փոխթաղապետի կապին, ապա «Հրապարակ» լրատվականի հետ զրույցում Ավան վարչական շրջանի ղեկավար Արա Դանիելյանը հերքել է այդ տեղեկությունը։
Ապօրինի շինության և դրա ապամոնտաժումից հետո արված լուսանկարները՝ ստորև.
Հեղինակ՝ Մարի Ամիրջանյան