Թրամփի՝ Նոբելյան մրցանակ չստանալը ինձ չզարմացրեց
Ամերիկագետ Սուրեն Սարգսյանը գրել է. «Թրամփի՝ Նոբելյան մրցանակ չստանալը ինձ չզարմացրեց։ Նրա թիմում էլ հասկանում են, թե որքան ոչ լիարժեք կլիներ այդ մրցանակը, քանի դեռ շարունակվում էր իսրայելա-պաղեստինյան հակամարտությունը։ Իսկ այստեղ հրադադարը հաստատվեց մրցանակի ներկայացման ժամկետի ավարտից հետո, հետևաբար Թրամփը հաջորդ տարվա խաղաղության մրցանակի թեկնածու լինելու իրավունք ձեռք բերեց։
Այսօր արդեն «Նյու Յորք Թայմս»-ը տեղեկություն հրապարակեց այն մասին, որ Թրամփը Կենտրոնական հետախուզական գործակալությանհ (CIA) հանձնարարել է հատուկ գործողություն կազմակերպել Վենեսուելայի նախագահ Նիկոլաս Մադուրոյի դեմ և այդ երկրում իշխանափոխություն իրականացնել։ Հետևաբար ճիշտ չէր լինի, եթե մրցանակը ստանալուց օրեր անց ԱՄՆ նախագահը նման ռազմական գործողություն իրականացներ։ Այս տեսանկյունից շատ տրամաբանական է նաև այն, որ խաղաղության Նոբելյան մրցանակը տրվել է Վենեսուելայի ընդդիմության առաջնորդին, ով էլ իր հերթին այս մրցանակի իրական հաղթող է հայտարարեկ հենց Թրամփին։
Ավելին, եթե հաշվի առնենք, որ հաջորդ տարվա Նոբելյան մրցանակաբաշխությունը կայանալու է ԱՄՆ-ում կայանալիք միջանկյալ ընտրություններից երեք շաբաթ առաջ (որոնք Թրամփի համար կենսական նշանակություն ունեն), ապա ամեն ինչ շատ տրամաբանական է թվում։
Հենց այս պատճառով էլ Թրամփը այս հարցում առանձնապես կոշտ հայտարարություններով հանդես չեկավ՝ հավանաբար վստահ լինելով, որ իր հերթը հաջորդ տարի է»:
