Թրամփը սպառնում է «լիակատար վերահսկողություն» հաստատել Իրանի նավթարդյունաբերության նկատմամբ

ԱՄՆ նախագահ Դոնալդ Թրամփն այսօր կրկին սպառնացել է խոշոր հարվածներ հասցնել Իրանին և իր վերահսկողությունը հաստատել նավթի և գազի արդյունաբերության նկատմամբ, քանի որ պատերազմող երկրների միջև շարունակվող հարձակումները Մերձավոր Արևելքը մոտեցնում են լայնածավալ պատերազմի վերսկսմանը։ Այս մասին գրում է Associated Press-ը։

Թրամփը սոցիալական ցանցերում գրառման մեջ նշել է, որ ԱՄՆ-ն այսօր երեկոյան «շատ հզոր» հարված կհասցնի Իրանին և «ոչ շատ հեռավոր ապագայում» «կստանձնի լիակատար վերահսկողությունը» Իրանի նավթի և գազի արդյունաբերության, այդ թվում՝ Խարգ կղզու նավթի նկատմամբ։

Խարգ կղզին, որը գտնվում է Պարսից ծոցի մյուս կողմում՝ Քուվեյթում և Սաուդյան Արաբիայում գտնվող ամերիկյան բազաներից այն կողմ, Իրանի նավթարդյունաբերության սիրտն է, որի միջով է անցնում արտահանման 90%-ը։

Թրամփն Իրանի հետ կապված իր ծրագրերը համեմատել է Վենեսուելայի նավթային ոլորտի հետ, որին հասավ այս տարվա հունվարին այդ երկրի գործող նախագահ Նիկոլաս Մադուրոյին ձերբակալելուց հետո։

Նշենք, որ երկու օր անընդմեջ ԱՄՆ-ն և Իրանը փոխադարձ հարվածներ են հասցնում։ Ամերիկյան հարձակումը, որը տևել է մինչև այսօր առավոտ Իրանում, ավելի ինտենսիվ և լայնածավալ է, քան նախորդ օրը։

Իրանը քիչ տեղեկություններ է հրապարակել վնասի չափի վերաբերյալ և հայտարարել, որ պատասխանել է Քուվեյթի, Բահրեյնի և Հորդանանի ուղղությամբ, ինչպես արել էր մեկ օր առաջ։

Նշենք, որ ապրիլին Թրամփը զգուշացրել էր Իրանին, որ «ամբողջ քաղաքակրթությունը կմահանա այսօր գիշեր՝ երբեք չվերադառնալով», եթե այն չհամաձայնվի իր պայմաններին, նախքան պատերազմում հրադադարի ժամկետը երկարաձգելը:

Աղբյուր՝ AntiFake.am