Հայաստանը որպես մեդիա ներկայացուցիչներին ազատազրկող պետություն է դասակարգվել Սամսոնյանին և Սաղաթելյանին կալանավորելու համար
Հայաստանը առաջին անգամ ընդգրկվել է Եվրոպայի խորհրդի Press Freedom in 2025 տարեկան զեկույցում՝ այն երկրների շարքում, որտեղ լրագրողներն ու մեդիա ներկայացուցիչները զրկված են ազատությունից։ Զեկույցը հրապարակել է «Լրագրողների անվտանգության պլատֆորմ»-ը, որը վերահսկում է Եվրոպայում մամուլի ազատության դեմ ուղղված լուրջ սպառնալիքները։
Բանտարկված լրագրողներ ունեցող երկրների ցանկում նշված են․
• Ռուսաստան — 58
• Ադրբեջան — 36
• Բելառուս — 27
• Թուրքիա — 24
• Հայաստան — 2
• Վրաստան — 1
Հայաստանի ընդգրկումը կապված է ընդդիմադիր փոդքասթերներ Վազգեն Սաղաթելյանի և Նարեկ Սամսոնյանի նախնական կալանքի հետ։
Նրանք ձերբակալվել են Imnemnimi փոդքասթի թողարկումներից մեկի կապակցությամբ, որի հյուրն էր նախկին նախագահ Սերժ Սարգսյանը։ Եթերում հնչել էին կոշտ արտահայտություններ Ազգային ժողովի նախագահ Ալեն Սիմոնյանի հասցեին։ Իրավապահ մարմինները քրեական գործ են հարուցել խուլիգանության հոդվածով՝ պնդելով, որ որոշ արտահայտություններ ունեն քրեորեն պատժելի բնույթ։
Պաշտպանական կողմը մեղադրանքները համարում է քաղաքական դրդապատճառներով պայմանավորված՝ նշելով, որ գործը բխում է կառավարության հասցեին հնչեցված քննադատությունից և նպատակ ունի քրեականացնել քաղաքական խոսքը։ Իրավապաշտպաններն էլ հարցականի տակ են դրել խոսքի հետ կապված գործողությունների համար խուլիգանության հոդվածի կիրառման համաչափությունը։
Երևանի առաջին ատյանի ընդհանուր իրավասության դատարանը սկզբում նշանակել էր երկու ամիս կալանք, որը հետագայում երկարաձգվել է ևս երեք ամսով։ Երկարաձգումից հետո Սամսոնյանը հայտարարել էր անժամկետ հացադուլ, ինչի ընթացքում նրա առողջական վիճակը կտրուկ վատթարացել էր։ Այնուհետև նրա խափանման միջոցը փոխվել էր տնային կալանքով։ Դատարան նա ներկայացել է անվասայլակով։ Սաղաթելյանը շարունակում է մնալ բանտային կալանքի տակ։
Սա առաջին դեպքն է, երբ եվրոպական մոնիթորինգային կառույցները պաշտոնապես դասակարգում են Հայաստանը որպես մեդիա ներկայացուցիչներին ազատազրկող պետություն, ինչը վկայում է երկրում մամուլի ազատության վերաբերյալ միջազգային գնահատականների էական փոփոխության մասին։
Աղբյուր՝ AntiFake.am
