Լիբանանում պաշտոնապես բացվել է երկրի երկրորդ միջազգային օդանավակայանը
Լիբանանում պաշտոնապես բացվել է երկրի երկրորդ միջազգային օդանավակայանը, որը, ինչպես սպասվում է, արդեն առաջիկա շաբաթներին կսկսի ընդունել ուղևորների, հայտնել է Associated Press-ը։
Հանդիսավոր արարողությունը տեղի է ունեցել երկրի հյուսիս-արևմուտքում՝ Սիրիայի սահմանից ոչ հեռու գտնվող Ռենե Մուավադի անվան օդանավակայանում։ Միջոցառմանը ժամանել է Լիբանանի վարչապետ Նավաֆ Սալամը, որի ինքնաթիռը դարձել է առաջիններից մեկը, որը վայրէջք է կատարել նորացված օդանավակայանում։
Մինչ այժմ Լիբանանի միակ միջազգային օդանավակայանը Բեյրութի Ռաֆիկ Հարիրիի անվան օդանավակայանն էր։ Վերջին տարիներին այն աշխատում էր խիստ ծանրաբեռնված՝ սպասարկելով նաև հարևան Սիրիայից ժամանող ուղևորների զգալի հոսք։
Նոր օդանավակայանը գտնվում է հյուսիսային Աքար նահանգի ծովափնյա Քլեյաթ ավանում՝ Բեյրութից մոտ 100 և Սիրիայի սահմանից ընդամենը հինգ կիլոմետր հեռավորության վրա։ Այս շրջանը համարվում է երկրի ամենաքիչ զարգացածներից մեկը և երկար տարիներ մնացել է պետական ներդրումների վերջնամասում։
Բացման արարողության ժամանակ ելույթ ունենալով՝ վարչապետ Նավաֆ Սալամն ընդգծել է, որ նախագիծն ունի ոչ միայն տրանսպորտային, այլև սոցիալ-տնտեսական նշանակություն։ Ըստ նրա՝ խոսքը «ոչ թե ներդրումային նախագծի, այլ հավասարակշռված զարգացման և տարածաշրջանների միջև արդարության ուղղությամբ կատարվող քայլի մասին է»։
Տրանսպորտի նախարար Ֆայեզ Ռասամնին հայտնել է, որ գործարկումից հետո օդանավակայանը կսկսի չվերթներ իրականացնել դեպի Թուրքիայի Ստամբուլ և Մերսին քաղաքներ, ինչպես նաև դեպի Դուբայ (ԱՄԷ)։ Հետագայում իշխանությունները ծրագրում են օդային հաղորդակցություն հաստատել նաև Աթենքի, Կահիրեի և Սաուդյան Արաբիայի Մեդինա քաղաքի հետ։
Օդանավակայանը կոչվել է Լիբանանի ընտրված նախագահ Ռենե Մուավադի պատվին, որը սպանվել էր 1989 թվականին Բեյրութում տեղի ունեցած պայթյունի հետևանքով, ընտրվելուց ընդամենը մի քանի օր անց։ Լիբանանում քաղաքացիական պատերազմի թեժ շրջանում խորհրդարանի նիստը, որի ընթացքում Մուավադն ընտրվել էր նախագահ, անցկացվել էր հենց այս օդանավակայանի տարածքում։
