Վրաստանի պետական անվտանգության ծառայությունը ձերբակալել է ընդդիմության առաջնորդներից մեկին
Պետական անվտանգության ծառայությունը ձերբակալել է «Միացյալ ազգային շարժում» կուսակցության քաղխորհրդի անդամ Լևան Խաբեիշվիլիին՝ պաշտոնյաներին հրապարակավ կաշառք խոստանալու մեղադրանքով: Ձերբակալման մասին հայտնի է դարձել Պետական անվտանգության ծառայությունում անցկացված ճեպազրույցի ժամանակ, հաղորդում է Грузия Online-ը:
«Գործը վերաբերում է պաշտոնյաներին հրապարակայնորեն կաշառք խոստանալու փաստին։ Մասնավորապես, քաղաքական կուսակցություններից մեկի ներկայացուցիչ Լևան Խաբեիշվիլին հանրային տարածքում՝ հեռուստատեսությամբ և սոցիալական ցանցերում կոչեր է տարածել և խոստացել կաշառել ուժային կառույցների աշխատակիցներին, եթե նրանք հրաժարվեն կատարել իրենց պարտականություններն իշխանությունների դեմ բողոքի ակցիաների ժամանակ։ Եվ նաև, եթե նրանք չօգտագործեն օրենքով նախատեսված իրենց տրամադրության տակ գտնվող հատուկ միջոցները։
Լևան Խաբեիշվիլին հրապարակայնորեն խոստացել է նման գործողություններ իրականացնողներին 200 հազար ԱՄՆ դոլար վճարել։ Բացի դրանից, նա հրապարակայնորեն խոստացել է նույն 200 հազար դոլարը վճարել որպես կաշառք այն ոստիկաններին, ովքեր կտրամադրեն իրենց ծառայողական գործունեությանը վերաբերող տարբեր տեղեկություններ և դասակարգված նյութեր։ Նա միաժամանակ խոստացել է վճարել նշված գումարը հատուկ հանձնարարությունների վարչության աշխատակիցներին՝ մարզանքներին և վարժանքներին մասնակցելուց հրաժարվելու դիմաց։
Լևան Խաբեշվիլին միաժամանակ հրապարակայնորեն հայտարարել է, որ նպատակահարմար է համարում խոստացված գումարը վճարել ոստիկաններին, քանի որ իշխանությունը փոխելու համար պետք է օգտագործվեն ցանկացած մեթոդ։ Քանի որ Խաբեշվիլիի գործողությունները երկարատև և համակարգված էին, դրանք պարունակում են Վրաստանի Քրեական օրենսգրքի 339-րդ հոդվածի 2-րդ մասով նախատեսված հանցագործության բոլոր նշանները։ Մենք նրան կալանավորել ենք որպես մեղադրյալ՝ դատավորի որոշման հիման վրա։ Հանցագործությունը նախատեսում է 4- 7 տարի ազատազրկման պատիժ»,- հայտարարել է Պետական անվտանգության ծառայության պետի առաջին տեղակալ Լաշա Մաղրաձեն։