Իրանը չի բացի Հորմուզի նեղուցը, քանի դեռ ԱՄՆ-ը խախտում է զինադադարը. Ղալիբաֆ
Իրանը հայտարարել է, որ չի բացի Հորմուզի նեղուցը, քանի դեռ ԱՄՆ-ը շարունակում է խախտել զինադադարը, ներառյալ՝ ծովային շրջափակումը: Դրա մասին հայտնել է Իրանի խորհրդարանի նախագահ Մոհամմադ-Բաղեր Ղալիբաֆը:
X սոցիալական ցանցի իր էջում նա ընդգծել է. «Կրակի լիարժեք դադարեցումն այն ժամանակ իմաստ ունի, երբ այն չի խախտվում ծովային շրջափակմամբ, համաշխարհային տնտեսությանը պատանդ վերցնելով… Հորմուզի նեղուցի բացումն անհնար է զինադադարի կոպտագույն խախտման պայմաններում»:
Ավելի վաղ՝ ապրիլի 8-ին, Վաշինգտոնն ու Թեհրանը հայտարարել էին կրակի դադարեցման մասին: Դրանից հետո Իսլամաբադում անցկացված բանակցություններն ավարտվեցին առանց արդյունքի: Միևնույն ժամանակ, մարտական գործողությունների վերսկսման մասին հաղորդումներ չեն ստացվել, սակայն ԱՄՆ-ը սկսել է իրանական նավահանգիստների ծովային շրջափակումը:
Ներկայում միջնորդները փորձեր են ձեռնարկում բանակցությունների նոր փուլ կազմակերպելու համար:
