Թբիլիսիի դատարանը «Կրիստալ Գրուպ»-ի սեփականատեր Վլադիմիր Ստեփանյանի նկատմամբ կիրառել է կալանքը

Թբիլիսիի քաղաքային դատարանը «Կրիստալ» խմբի սեփականատեր Վլադիմիր Ստեփանյանի նկատմամբ որպես խափանման միջոց սահմանել է ազատազրկում։ 1tv.ge-ի հաղորդմամբ, դատախազությունը միջնորդել է Ստեփանյանին դատապարտել ազատազրկման, քանի որ, ըստ դատախազի, Ստեփանյանը վտանգ է ներկայացնում վկաների վրա ազդելու, ապացույցները ոչնչացնելու և թաքնվելու համար։

Ստեփանյանը դատավարության ժամանակ ոչինչ չի ասել գործի մասին։ Փաստաբանը միջնորդել է Ստեփանյանին ազատ արձակել 500,000 լարի գրավի դիմաց։

Դատախազությունը Վլադիմիր Ստեփանյանին մեղադրում է ապօրինի ձեռնարկատիրական գործունեության և ապօրինի եկամուտների օրինականացման մեջ։ Փաստաբան Թամար Մերլանիի խոսքով, հողատարածքը, որտեղ Ստեփանյանը շինարարական աշխատանքներ էր իրականացնում, նրա սեփականությունն էր։

Դատավարության ընթացքում հայտնի է դարձել, որ Ստեփանյանը շինարարական թույլտվություն ուներ, բայց Վլադիմիր Ստեփանյանը կառուցել է ավելի շատ բնակելի շենքեր, քան ուներ թույլտվություն։ Ըստ դատախազի, Ստեփանյանը չի հերքում այս փաստը։

Ըստ դատախազության, պարզվել է, որ «Կրիստալ» խմբի մաս կազմող «Բակուրիանի բիզնես խումբ» ՍՊԸ-ի հիմնական գործունեությունը Բակուրիանի բնակավայրում հյուրանոցային տիպի բնակելի համալիրների կառուցումն ու հետագա վաճառքն էր։ Դատախազության տվյալներով, Ստեփանյանը աստիճանաբար օտարել է անօրինական կառուցված բնակելի տարածքները։ Այս կերպ «Բակուրիանի բիզնես խումբ» ՍՊԸ-ն ստացել է խոշոր եկամուտ՝ 1,894,925 լարի։ Ստացված խոշոր գումարներին օրինական ձևակերպում տալու համար մեղադրյալը գումարի մի մասը մուտքագրել է «Բակուրիանի բիզնես խումբ» ՍՊԸ-ի բանկային հաշիվներին, իսկ մի մասը փոխանցել է իր անձնական սեփականությանը, որից հետո ձեռք է բերել անշարժ/շարժական գույք ձեռնարկության, իր և նրա հետ կապված անձանց անունով։

Մեղադրանքը ճանաչվելու դեպքում Վլադիմիր Ստեփանյանին սպառնում է 9-ից 12 տարվա ազատազրկում։