Դու պետության ղեկավա՛ր ես, հրապարակախոս չես. Hraparak.am

article-image

«Hraparak.am»-ը գրում է

«Նիկոլ Փաշինյանը կապանյան ասուլիսում մի ուշագրավ հայտարարություն արեց՝ պատասխանելով հարցին, թե 2016-ին ասել էր, որ ապրիլյան պատերազմը տեղի է ունեցել Ռուսաստանի գիտությամբ եւ համաձայնությամբ, այս պահին է՞լ է այդպես մտածում։ «Ինչ որ ասել եմ 2016 թվականին, մինչեւ հիմա էլ իմ ֆեյսբուքյան էջին կա,- հպարտացավ Փաշինյանը՝ ավելացնելով։- Ձեզ ավելին ասեմ՝ ես մեր հանրության շրջանում առկա մի շարք մտահոգությունների մասին քննարկում եմ ունեցել նաեւ Ռուսաստանի մեր գործընկերների հետ եւ շատ ուրախ եմ, որ շատ բարեկամական, եղբայրական, ռազմավարական դաշնակցային մթնոլորտում մենք այդ հարցերը քննարկել ենք, խոսել, վերլուծել ենք իրավիճակը մանրամասն եւ փոխադարձաբար ստացել ենք մեզ անհրաժեշտ հարցերի պատասխանները»։

Նրա այս հայտարարությանը, ինչպես արդեն տեղեկացրել էինք,  արձագանքել էր Արմեն Աշոտյանը՝ ԱԺ ապրիլյան դեպքերի ժամանակավոր հանձնաժողովի ուշադրությունը հրավիրելով վարչապետի ասածի վրա, որ հանձնաժողովի նախագահ իմքայլակական Անդրանիկ Քոչարյանը պարտավոր է նրան հրավիրել ու հարցեր տալ։

Մենք այս թեմայով զրուցեցինք նաեւ ռուսաստանցի վերլուծաբան Ստանիսլավ Տարասովի հետ, ով հայտնի է իր բավականին հայամետ հայացքներով։ Հարցրինք, թե ինչպես, ինչ մակարդակում կարող էին նման հարցեր բարձրացվել ՀՀ վարչապետի կողմից։ Ի վերջո, ի՞նչ են պատասխանել Փաշինյանին Կրեմլից։ Տարասովն ասում է՝ պարզ չէ, թե Փաշինյանն ում հետ է այդ հարցը քննարկել։ «Նախ, մենք այդ մասին տեղեկատվություն չունենք։ Երկրորդ․ նրա այդ մեղադրանքը, որ Ռուսաստանն է սադրել ապրիլյանը, մեկ այլ բան է՝ ասել, երբ դու ընդդիմություն ես, մեկ այլ բան՝ երբ վարչապետ ես, պետության գլուխ։ Առավել եւս, երբ պետության առաջին դեմքը ՌԴ-ին՝ ՀԱՊԿ, ԵԱՏՄ դաշնակցին մեղադրում է։ Դա չի կարող անել՝ հղում անելով ինչ-որ մի լրատվամիջոցի, ինչ-որ մի հրապարակման․․․ դու պետության ղեկավար ես, հրապարակախոս չես։ Ես՝ Տարասովս, կարող եմ սխալվել, դու՝ ոչ։ Սա ահավոր անպատասխանատու է»,- ասում է քաղաքագետը։ Նա, իհարկե, փորձեց հերքել Փաշինյանին՝ ասելով․ «Եթե ՌԴ-ն էր սադրում, ինչո՞ւ էր, ուրեմն, մեկ օր անց կարմիր գորգին հրավիրել Հայաստանի ու Ադրբեջանի ԶՈւ գլխավոր շտաբների պետերին եւ ուլտիմատիվ հրահանգել՝ դադարեցնել կրակը»։

Շարունակելով թվարկել Նիկոլ Փաշինյանի կապանյան անպատասխանատու հայտարարությունները՝ Տարասովն ասում է․ «Եվ ՌԴ-ի կողմից շրջաններ հանձնելու մեջ, իբր, շահագրգռված լինելը հիմնավորեց ինչ-որ պարբերականի հղում անելով։ Ի դեպ, անպատասխանատու է նաեւ այդ պարբերականը չնշելը՝ դաշնակցիդ մեղադրելիս։ Դու պետության ղեկավար ես, կարող ես ունենալ հետախուզության տվյալ, հակահետախուզության, բայց հղում անել ինչ-որ թերթի․․․ Իսկ հետո վերցրեց ու շարադրեց Մադրիդյան սկզբունքները։ Եվ նաեւ մեղադրեց, որ դրանք ընդունել է Սերժ Սարգսյանը։ Սա կատարյալ հիմարություն է, որովհետեւ դրանք մշտապես եղել են բանակցությունների սեղանին։ Եվ հիմա էլ Փաշինյանը ԱԳՆ մակարդակով եւ անձնապես էլ խոսում է դրանց հիմքով։ Եվ ազնիվ կլիներ ասել, որ միջնորդների կողմից ներկայացված Մադրիդյան սկզբունքները չեն բավարարում, մենք հրաժարվում ենք դրանցից։ Եվ ի՞նչ կապ ունի այստեղ Սարգսյանը»։ Քաղաքագետն ուշադրություն է հրավիրում Կապանում վարչապետի մեկ այլ խոսքի վրա, թե Սարգսյանը պատրաստ էր տալ 7 շրջանները, համադրում է դրանք ու եզրակացնում․ «Իր տրամաբանությամբ ստացվում է, որ Ռուսաստանը պատերազմ է հրահրել այդ սկզբունքների իրագործումը խափանելո՞ւ համար։ Այո՞»։

Նա շեշտում է, որ իր այս հայտարարությամբ Փաշինյանն անհարմար դրության մեջ դրեց Արցախի նախագահի թեկնածուներին, որոնք բոլորն էլ հայտարարեցին, որ դեմ են։ «Ռուսաստանն էլ դեմ է, թեկնածուներն էլ, եւ ստացվում է, որ Արցախի նախագահի բոլոր թեկնածուները ռուսամետ են։ Սա ի՞նչ տրամաբանություն է․․․ մենք չենք կարողանում հասկանալ, թե սա ինչ է, ինչ խաղ։ Նա ոչ մի կերպ չի կարողանում դուրս գալ հրապարակախոսի կերպարից»։ Շարունակելով մեջբերել Փաշինյանին՝ Տարասովն ասաց․ «Սերժ Ազատիչն ինձ այսպիսի ժառանգություն է թողել․․․ Սերժ Ազատիչը քեզ թողել է 8 շրջան, որոնք չի հանձնել։ Ահա թե ինչ է քեզ թողել։ Եվ ոչ այդ կասկածելի բովանդակությամբ թուղթը»։

 

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Ստուգի՛ր փաստերը մեր միջոցով
Լրահոս
նիկոլ-օ-մետր

Նիկոլ-օ-մետրը գործիք է, որի միջոցով կարող եք իմանալ, թե որքանով է ՀՀ վարչապետ Նիկոլ Փաշինյանը կատարում իր խոստումները:

Ամենաընթերցվածը