«CaucasusHeritageWatch» նախաձեռնությունը ահազանգում է. ավերման վտանգի տակ է հայտնվել Արցախի օկուպացված տարածքում գտնվող Սուրբ Աստվածածին եկեղեցին՝ Մարտունու շրջանի Թաղավարդ գյուղում։
Արբանյակային լուսանկարները ցույց են տալիս, որ հունիսի 10-ից հուլիսի 12-ն ընկած միջակայքում Թաղավարդ գյուղի արևմտյան մասը բուլդոզերով հարթեցված է։ Ավերված գոտին այժմ հասնում է եկեղեցուն։
Բազիլիկ ոճով կառուցված եկեղեցու կառուցումը թվագրվում է 1840 թվականին։
2020 թվականի ապրիլին Արցախում նշում էին Թաղավարդ գյուղի անվանակոչման 100 ամյակը։ Թաղավարդի գյուղապետը այդ ժամանակ ասել էր, որ գյուղում գտնվում են 7 սրբավայրեր, որոնք գտնվում են անմխիթար վիճակում։ Հաշվի առնելով արբանյակային լուսանկարներով պատկերված վիճակը և ավերված գյուղը՝ կարելի է ենթադրել, որ դրանցից որոշների հետքերը արդեն իսկ վերացվել են։ Այժմ հերթը Սուրբ Աստվածածին եկեղեցունն է։
Աղբյուր՝ AntiFake.am