.jpeg)
Այսօր խորհրդարանական ճեպազրույցների շրջանակներում լրագրողների հարցերին իշխանական պատգամավորներից պատասխանելու էին ներկայացել պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը, խմբակցության մեդիա պատասխանատու Արթուր Հովհաննիսյանը և պատգամավոր Հերիքնազ Տիգրանյանը:
Ի թիվս այլ հարցերի` լրագրողները Քոչարյանից հետաքրքվեցին, թե ինչու են սահմանագծման և սահմանազատման աշխատանքների հիմք հանդիսանում Խորհրդային Ադրբեջանի և Խորհրդային Հայաստանի քարտեզները այն դեպքում, երբ Ադրբեջանը 1991 թվականին անկախանալիս հրաժարվել էր ճանաչել Խորհրդային Ադրբեջանի իրավահաջորդությունն ու հռչակել, որ վերականգնում է 1918-1920թթ. «մուսաֆաթական» Ադրբեջանի Հանրապետությունը:
Սկզբում Քոչարյանը հեգնեց. «իսկ ի՞նչ քարտեզ պետք է լիներ, Տիգրան Մեծի՞», այնուհետև շարունակեց մի քանի հերթապահ նախադասությամբ ու այդպես էլ չպատասխանեց հարցին: Քոչարյանի այդ նախադասությունները, սակայն, վկայում են այն մասին, որ Հայաստանի ներկայիս իշխանությունները ևս մեկ զիջման են գնացել Ադրբեջանի առաջ ու ընդունել են վերջինիս համար ձեռնտու պայմանը` օգտագործելով խորհրդային քարտեզները:
Մյուս կողմից` Անդրանիկ Քոչարյանը իր պատասխանով հակասեց Նիկոլ Փաշինյանին, որը մի քանի օր առաջ խորհրդարանում հայտարարեց կոնկրետ քարտեզների մասին, որոնք կարգավորել են Խորհրդային Հայաստանի և Խորհրդային Ադրբեջանի միջև եղած սահմանը: Այսինքն, այս պարագայում Անդրանիկ Քոչարյանը պարզապես խուսափեց ընդունել ադրբեջանական խորհրդային քարտեզների առկայությունը բանակցային սեղանին: Մինչև Քոչարյանը պնդում է, որ բանակցությունների արդյունքում պետք է տրվեն նաև այն հարցերի պատասխանները, թե որ քարտեզներով պետք է առաջնորդվեն, Նիկոլ Փաշինյանն արդեն իսկ որոշել է:
Հետաքրքիր իրավիճակ է ստեղծվում. Հայաստանն ընդունում է Ադրբեջանի խորհրդային ժառանգությունը, իսկ Ադրբեջանը, այն չընդունելով հանդերձ, պարտադրում է:
Անդրանիկ Քոչարյանի մեկնաբանությունը` ստորև.
Աղբյուր՝ AntiFake.am