Նիկոլ Փաշինյանի իշխանության գալով` տարբեր իշխանական թևերում վաղուց արդեն զարմանալի չեն պրոադրբեջանական ուղղվածություն ունեցող գործիչները և նրանց աջակիցները, որոնք արդեն տարիներ շարունակ խաղաղասիրության, համակեցության և երկու ժողովուրդների համերաշխության մասին տարբեր քարոզչական թեզեր են առաջ տանում:
Վերջին շրջանում, պայմանավորված Արցախյան 44-օրյա պատերազմի ելքով ու դրան հաջորդած իրադարձություններով` նման մարդկանց թիվն ավելացել է: Նրանք և՛ պաշտպանում են Նիկոլ Փաշինյանին, և՛ խաղաղության կոչեր անում:
Հայտնի է, որ ադրբեջանական պետական քարոզչությունը տարիներ շարունակ առաջ է մղել «Խոջալուի ցեղասպանության» ստահոդ և միֆականացված թեզը` մեղադրելով հայկական կողմին: Տարիներ շարունակ Հայաստանը և հայկական քարոզչական խմբերը հաջողությամբ պայքարել են այս հակահայկական և կեղծ թեզի դեմ: Սակայն վերջին տարիներին հայտնի ՊՈԱԿԻ «վերապրոֆիլավորման» հետևանքով այս աշխատանքը ևս բարձիթողի վիճակում է:
Հատկանշական է, որ ներկայիս իշխանություններին սատարում են այնպիսի մարդիկ, որոնք այսօր ցավակցում են ադրբեջանցիներին Խոջալուում տեղի ունեցած դեպքերի առնչությամբ:
Նրանցից մեկն էլ քաղաքացի Իշխան Վերդյանն է: Վերջինս համոզված և մոլի իշխանական է, որը փետրվարի 26-ին ցավակցում է ադրբեջանցիներին: Իշխան Վերդյանը նշում է, որ «իր հերթին խոստանում է անել իրենից կախված ամեն հնարավորը, որ այն մարդակերները, որոնք իրականացրել են մարդկության դեմ այդ չարագործությունը, դատվեն և արտահանձնվեն Ադրբեջանին»:
Նշված օգտատերը բազմաթիվ հետևորդներ ունի սոցիալական ցանցերում, ունի նաև առանձին յութուբյան ալիք:
Իշխան Վերդյանը իր տեսանյութերում նաև չի խորշում հեղինակազրկել հայկական բանակը, վիրավորել տարբեր գործիչների: Նրա էջում վխտում են ադրբեջանական օգտահաշիվները, որոնք աջակցում ու շնորհակալություն են հայտնում այդ մարդուն պրոադրբեջանական քարոզչություն անելու համար:
Իհարկե, պարզ է, թե նման հայտարարությունների հիմքերն ուր են տանում: Սակայն մտահոգիչն այն է, որ այսօր Ազգային անվտանգության ծառայությունը դադարել է մտածել Հայաստանում գործող ադրբեջանական քարոզիչների մասին, այնինչ հենց նրանք են հանդիսանում ազգային անվտանգության սպառնալիք, ոչ թե այն ֆեյքը, որը հայհոյում է Նիկոլ Փաշինյանին և նրա շրջապատին:
Ճանաչե՛ք իրական ադրբեջանական քարոզիչներին:
Աղբյուր՝ AntiFake.am