Ռուսաստանն առայժմ Թրամփի Խաղաղության խորհրդին անդամակցելու որոշում չի կայացրել. Պեսկով

Ռուսաստանը դեռ որոշում չի կայացրել ԱՄՆ նախագահ Դոնալդ Թրամփի նախաձեռնությամբ ստեղծված Խաղաղության խորհրդին անդամակցելու վերաբերյալ։ Մերձավոր Արևելքում ԱՄՆ ագրեսիայի ֆոնին հայեցակարգն ավելի քիչ արդիական է թվում, քան նախկինում. TAСС-ին հայտնել է Ռուսաստանի նախագահի մամուլի քարտուղար Դմիտրի Պեսկովը:

«Ոչ, այդպիսի որոշում չկա»,- պատասխանել է նա այն հարցին, թե արդյոք կա Խաղաղության խորհրդին անդամակցելու որոշում։

«Տեսնում ենք, որ քանի դեռ [Մերձավոր Արևելքում] պատերազմ է ընթանում, «Խաղաղության խորհուրդ» արտահայտությունը, հավանաբար, հիմա ավելի քիչ արդիական է, քան մինչև այս պատերազմի սկիզբը,- հավելել է նա։ – Հավանաբար պետք է սպասել, թե ինչպես կավարտվի այս ամենը»։

Խաղաղության խորհուրդը պաշտոնապես ստեղծվել է հունվարի 22-ին, երբ Դավոսում 19 երկիր ստորագրեց դրա կանոնադրությունը։ Կազմակերպությունը ձևավորվել է ԱՄՆ-ի ակտիվ մասնակցությամբ։ Սկզբնապես կառույցը ստեղծվում էր Իսրայելի և ՀԱՄԱՍ-ի միջև պայմանավորվածությունների շրջանակում Գազայի հատվածը կառավարելու համար (աշխատանքի այս ձևաչափը հաստատել էր նաև ՄԱԿ-ը), սակայն Վաշինգտոնն ակտիվորեն առաջ է մղում այլ տարածաշրջաններում հակամարտությունների կանխարգելման և կարգավորման համար խորհուրդն օգտագործելու գաղափարը։

Ռուսաստանի ԱԳՆ-ն, որին հանձնարարված է ձևակերպել Մոսկվայի դիրքորոշումն այս հարցում, TAСС-ին ընդգծել է, որ Խաղաղության խորհրդի ներկայիս կանոնադրությունն ու մանդատը հարցեր են առաջացնում, քանի որ մի շարք չափանիշներով հայտարարում են ՄԱԿ-ի գործող կառույցների «փոխարինման» մասին։ Կազմակերպության նկատմամբ նմանատիպ հարցեր են առաջացել նաև Ռուսաստանի հետ բարեկամական շատ այլ երկրների մոտ։