Հայաստանի Հանրապետությունը, արդեն 19 օր է՝ գտնվում է արտակարգ դրության մեջ՝ իր բոլոր արտակարգ հանգամանքներով: AntiFake.am-ը շարունակում է իր բնականոն գործունեությունը և ամփոփ իր ընթերցողներին է ներկայացնում ապրիլի 3-ի իրադարձությունները:
Հայաստանում կորոնավիրուսով վարակակիրների թիվը հասել է 736-ի: Բուժվածների թիվը 43 է, մահվան ելքերը՝ 7: Այս մասին տեղեկացրել է Հիվանդությունների վերահսկման և կանխարգելման ազգային կենտրոնը:
«Այս պահին Նորքի ինֆեկցիոն հիվանդանոցում կա մոտ 200 պացիենտ, 12–ը գտնվում են ինտենսիվ թերապիայի բաժանմունքում»։ Այս մասին ֆեյսբուքյան ուղիղ եթերում տեղեկացրել է Առողջապահության նախարար Արսեն Թորոսյանը։
«Այս պահին ունենք մեկ ծայրահեղ ծանր պացիենտ Օրթոպեդիայի ինստիտուտում»,-ասել է Թորոսյանը
«ՀՀ պարետի ցուցմամբ, Երևանի քաղաքապետի հանձնարարությամբ, ս/թ ապրիլի 3-ից Երևան համայնքի ավտոբուսներով, դիտարկված թվով 40 երթուղիներով կիրականացվի Երևանի 30 բուժհաստատությունների աշխատակիցների ամենօրյա անվճար երկկողմանի տեղափոխումը՝ օրական 3-անգամյա ռեժիմով»: Այդ մասին Ֆեյսբուքյան իր էջում տեղեկացրել է Երևանի քաղաքապետարանի մամուլի խոսնակ Հակոբ Կարապետյանը:
«Տեսչական մարմնի երկու աշխատակցի մոտ թեստերը դրական են եղել: Մյուս թեստավորվողների մոտ բացասական է պատասխանը, կան նաև մեկուսացված և ինքնամեկուսացած աշխատակիցներ»։ Այդ մասին Կառավարության տեղեկատվական կենտրոնում կայացած մամուլի ասուլիսում հայտարարել է ԱԱՏՄ ղեկավար Հայկ Ավագյանը:
«Ընդհանուր առմամբ՝ Երևանի տարածքային կենտրոնից ունենք 14 ինքնամեկուսացված անձ, սահմանային հսկիչ կետերի այն անձինք, ովքեր հերթապահել են, թեստավորվել են ևս 6-ը, բարեբախտաբար բացասական է եղել թեստերի արդյունքները, և Երևանի տարածքային կենտրոնից ևս 2 հոգի թեստավորվել են, արդյունքները բացասական են: Այս պահի դրությամբ Երևանի տարածքային կենտրոնից ունենք մեկուսացված 17 հոգի, որոնք հյուրանոցում են»,- ներկայացրել է Ավագյանը:
Հայաստանի Հանրապետության պարետ Տիգրան Ավինյանի որոշմամբ՝ սահմանափակվել է ՀՀ-ից դիմակների, վիրակապերի, բամբակի եւ այլ բժշկական ապրանքների արտահանումը։
«Ղեկավարվելով «Հայաստանի Հանրապետությունում արտակարգ դրություն հայտարարելու մասին» Հայաստանի Հանրապետության կառավարության 2020 թվականի մարտի 16-ի թիվ 298-Ն որոշման հավելվածի 18-րդ և 19-րդ կետերով՝
1․ Ժամանակավորապես սահմանափակել որոշման հավելվածում սահմանված ապրանքների արտահանումը Հայաստանի Հանրապետությունից, այդ թվում` ԵԱՏՄ երկրներ: Ընդ որում՝ սույն որոշման հավելվածում նշված բժշկական արտադրատեսակների արտահանումը կարող է Պետական եկամուտների կոմիտեի կողմից թույլատրվել՝ հիմք ընդունելով Հայաստանի Հանրապետության առողջապահության նախարարության գրավոր համաձայնությունը արտահանման ենթակա ապրանքատեսակների և դրանց չափաքանակների վերաբերյալ։
2․ Ընդունել ի գիտություն Իրանի Իսլամական Հանրապետության և Հայաստանի Հանրապետության միջև բոլոր տեսակի ապրանքների փոխադրումն (արտահանում, ներմուծում, տարանցում) իրականացվում է հաշվի առնելով «Մեղրի» անցումային կետի բացթողումային հնարավորությունները և փոխադրվող ապրանքատեսակների չափաքանակներն ու առանձնահատկությունները։
3․ Իրանի Իսլամական Հանրապետության և Հայաստանի Հանրապետության միջև բոլոր տեսակի ապրանքների փոխադրումն (արտահանում, ներմուծում, տարանցում) իրականացվում է հետևյալ եղանակներով. ա) փոխաբեռնման ենթակա ապրանքները փոխաբեռնվում են կամ Մեղրիի անցումային կետի տարածքում կամ «Ագարակ Տերմինալ» սահմանափակ պատասխանատվությամբ ընկերության մաքսային հսկողության տարածքում, բ) փոխաբեռնման ոչ ենթակա ապրանքների փոխադրումը թույլատրվում է Պետական եկամուտների կոմիտեի գրավոր համաձայնությամբ, իսկ տեղաշարժը Հայաստանի Հանրապետության տարածքով և բեռնաթափումից հետո տրանսպորտային միջոցի վերադարձն Իրանի Իսլամական Հանրապետություն համակարգվում և հսկվում է Հայաստանի Հանրապետության ոստիկանության կողմից՝ հաշվի առնելով Հայաստանի Հանրապետության առողջապահության նախարարության ցուցումներն ու առաջարկությունները։
4․Թույլատրել Ռուսաստանի Դաշնությունից կամ Վրաստանից Հայաստանի Հանրապետության տարածքով Իրանի Իսլամական Հանրապետություն բեռնափոխադրումներ իրականացնող տրանսպորտային միջոցների վերադարձը Ռուսաստանի Դաշնություն կամ Վրաստան։
5․ Ուժը կորցրած ճանաչել Պարետի 2020 թվականի մարտի 19-ի «Առանձին ապրանքների համար արտահանման ժամանակավոր սահմանափակումների մասին» N 6 և Պարետի 2020 թվականի մարտի 22-ի «Իրանի Իսլամական Հանրապետության և Հայաստանի Հանրապետության միջև ապրանքների փոխադրման սահմանափակումներ սահմանելու և պարետի 2020 թվականի մարտի 19-ի N6 որոշման մեջ փոփոխություն կատարելու մասին» N 12 որոշումները։
6․ Սույն որոշումն ուժի մեջ է մտնում հրապարակման պահից»։