«Քաղաքացիական գիտակցություն» ՀԿ նախագահ, AntiFake.am կայքի հիմնադիր Նարեկ Սամսոնյանը դուրս է եկել Ոստիկանության բաժնից: Այս մասին ֆեյսբուքյան ուղիղ եթերում հայտնել է Նարեկ Սամսոնյանը:
Սամսոնյանը նախ շնորհակալություն է հայտնել ոստիկաններին և նշել, որ ոստիկանական համակարգում կան շատ փայլուն ոստիկաններ, ովքեր հարգում են իրենց ուսադիրները:
Սամսոնյանը հայտնել է, որ իրեն բաժին են բերել ոստիկանին վիրավորելու համար:
«Ես որևէ ոստիկանի չեմ վիրավորել և չեմ պատրաստվում վիրավորել ոստիկանին: Ես իրեն արժանի բառերով դիմել եմ ՀՀ պարետ Տիգրան Ավինյանին: Ես չէի խոսում այդ պահին ոստիկանի հետ, ես խոսում էի ոստիկանների և ոստիկանական համազգեստ հագած մի անծանոթ մարդու հետ, որը ոստիկան կոչվելու իրավունք չուներ»,- նշել է Սամսոնյանը:
Սամսոնյանը հայտնել է իր և ոստիկանի խոսակցության տեսագրության հրապարակայնացման մասին` նպատակով, որ հասարակությունը տեսնի, թե ինչպիսին էր ոստիկանի պահվածքը:
«Ես չեմ պատրաստվում փոխել իմ կարծիքը Տիգրան Ավինյանի, Նիկոլ Փաշինյանի և իրենց կառավարության մասին և պատրաստվում եմ պարզել, թե ովքեր են այս լեյտենանտի ուսադիրներ կրող անհայտ անձնավորության նման ոստիկանները, որոնք պատրաստ են իրենց ինքնասիրությունը, իրենց ուսադիրները դնել զոհասեղանին հանուն Նիկոլ Փաշինյանի, Տիգրան Ավինյանի և մնացածի չեղած ինքնասիրության: Այս իշխանություններին հայհոյում են Հայաստանի Հանրապետության քաղաքացիների 80 տոկոսը: Ոչ հրապարակային տիրույթում ես իրավունք ունեմ ամբողջությամբ անել այն, ինչ իրավունք ունեն անել Հայաստանի Հանրապետության քաղաքացիների զգալի մեծամասնությունը: Ես ոչ միայն ոստիկանին չեմ վիրավորել, այլև ես ոստիկանին չէ, որ վիրավորել եմ», - ասել է AntiFake.am կայքի հիմնադիրը:
Մանրամասները՝ տեսանյութում:
Աղբյուր` AntiFake.am
Կարդացե՛ք նաև՝
► (VIDEO) Մոռանում են, որ իրենց հագին համազգեստ է, ոչ թե գրպանում՝ «Քաղաքացիական պայմանագրի» տոմս. Նարեկ Սամսոնյան
► (VIDEO) Կարմիր բերետավորները բերման են ենթարկել Նարեկ Սամսոնյանին
► Նարեկ Սամսոնյանը բերվել է ոստիկանություն ոստիկանական ծառայողին հրապարակայնորեն վիրավորելու համար. ՀՀ Ոստիկանության պարզաբանումը
► (VIDEO) Նարեկ Սամսոնյանը դուրս է եկել Ոստիկանության բաժնից