«Քաղաքացիական գիտակցություն» ՀԿ նախագահ, AntiFake.am կայքի հիմնադիր Նարեկ Սամսոնյանը ֆեյսբուքյան ուղիղ եթերում անդրադարձել է սահմանադրական բարեփոխումների հանրաքվեին, ընդդիմության գործողություններին և ներքաղաքական իրավիճակի հնարավոր զարգացումներին:
«Այս հանրաքվեն իրականում Հայաստանի Հանրապետության քաղաքական և իրավական ապագայի վերջնական տապալումն է: Անկախ արդյունքներից, անկախ նրանից, թե ինչպիսի արդյունք է ունենալու հանրաքվեն՝ սա Նիկոլ Փաշինյանի իշխանության վերջի սկիզբն է», - պնդեց Սամսոնյանը:
Սամսոնյանը նշեց, որ հանրաքվեն հակասահմանադրական, հակաիրավական է, և ապագայում դրան կտրվի իրավական գնահատական:
«Նիկոլ Փաշինյանը, ըստ էության, վստահ է, որ իր իշխանության լեգիտիմությունը գնալով մաշվում է: Նա շատ լավ հասկանում է, որ ապրիլին ավելի վատ վիճակում է լինելու, քան հիմա է: Մայիսին ավելի վատ վիճակում է լինելու, քան ապրիլին»,- ասաց Սամսոնյանը:
Սամսոնյանը հավելեց, որ իշխանությունները սպառել են իրենց ողջ քաղաքական կապիտալը և այլևս չունեն այն լեգիտիմության աստիճանը, որ ունեին երկու տարի առաջ:
«Նիկոլ Փաշինյանը հաղթելու է բացառապես ընտրակեղծիքների միջոցով: Սահմանադրական հանրաքվեն միանշանակ կեղծվելու է»,- շեշտեց Սամսոնյանը:
Սամսոնյանը հավելեց, որ Նիկոլ Փաշինյանը ցանկանում է այս հանրաքվեով իր քաղաքական հակառակորդներին պարտության մատնել:
««Ոչ»-ի շուրջ համախմբված է գրեթե ողջ քաղաքական դաշտը՝ թե՛ արտախորհրդարանական ընդդիմությունը, թե՛ խորհրդարանական «ընդդիմությունը»: «Ոչ»-ի շուրջ կա կոնսենսուս, քանի որ այս «Ոչ»-ը այո՛ է Հայաստանի սահմանադրականությանը, այո՛ է Հայաստանի քաղաքական ապագային, այո՛ է Հայաստանի Հանրապետությանը»,- ասաց նա:
Սամսոնյանը կոչ արեց ակտիվ բոյկոտել հանրաքվեն:
«Ես վստահ եմ, որ որևէ պարագայում, որևէ ելքով Նիկոլ Փաշինյանը այս պրոցեսից հաղթող դուրս չի գալու»,- նշեց Սամսոնյանը:
Սամսոնյանը, անդրադառնալով հնարավոր քաղաքական զարգացումներին ,նշեց. «Մենք բոլոր հնարավոր օրինական ձևերով քայքայելու ենք այս իշխանությունների լեգիտիմությունը: Հայաստանի Հանրապետության քաղաքացիները բոլորը տեսնելու են ստի, կեղծիքի, հայհոյանքի իշխանության իրական դեմքը»:
Սամսոնյանը նաև հավելեց, որ իշխանությունները չեն կարողանալու ապահովել հանրաքվեի համար անհրաժեշտ մասնակցությունը և փորձելու են չհրապարակել ընտրողների ցուցակը:
«Հայաստանում ստեղծվելու է այնպիսի քաղաքական ճգնաժամ, որը հանգեցնելու է իշխանության ուղղակի փոփոխության»,- նշեց նա:
Մանրամասները՝ տեսանյութում:
Հոդվածի ռուսերեն տարբերակը: