Երեկվանից ակտիվորեն քննարկվում է այն փաստաթուղթը և դրա գաղտնի հավելվածը, որը պատրաստվում է ստորագրել վարչապետի պաշտոնակատար Նիկոլ Փաշինյանը: Սուրբ Աթոռում ՀՀ նախկին դեսպան Միքայել Մինասյանը հրապարակել էր փաստաթղթի որոշ հատված՝ պնդելով, որ նախապատրաստվում են նոր զիջումներ ոչ միայն Սյունիքում, այլ նաև Տավուշում և Արարատի մարզերում:
Նիկոլ Փաշինյանի կողմից փաստաթղթի առկայության փաստի ընդունումից հետո իշխանական քարոզչամիջոցների և լրատվականների կողմից սկսեց տարածվել ինչ-որ փաստաթուղթ, որը ներկայացվում էր որպես այն հայանպաստ փաստաթուղթը, որը պատրաստվում է ստորագրել Նիկոլ Փաշինյանը:
Նախ փաստաթուղթը հրապարակեց «ArmLur.am»-ը կայքը՝ հավելելով, որ ըստ կայքի տեղեկությունների՝ Փաշինյանի գլխավորությամբ Հայաստանի կառավարությունը համաձայնել է ստորագրել այս փաստաթուղթը միայն այն բանից հետո, երբ ադրբեջանցի զինծառայողները կլքեն Հայաստանի տարածքը, և փաստաթղթում խմբագրական մի քանի շտկումներ կարվեն: Ըստ տեղեկությունների՝ սա փաստաթղթի նախնական տարբերակն է, հայկական կողմ առաջարկել է փոփոխություն անել դրա մեջ:
Այնուհետև նույն տեքստը արտատպվեց իշխանական քարոզչամեքենա հանդիսացող ու Տարոն Չախոյանին պատկանող «MediaNews.site» լրատվականում:
«MediaNews»-ից էլ փաստաթուղթը արտատպվեց իշխանական ընտանիքի լրատվականում՝ «Հայկական Ժամանակ»-ում:
Բացի լրատվականներից՝ այս փաստաթուղթը տարածվում է արբանյակ կայքերով ու տարբեր ֆեյսբուքյան էջերով:
Ի հավելումն Միքայել Մինասյանը հայտարարության՝ հայազգի մեդիամագնատ Արամ Գաբրիելյանովն էլ, իր աղբյուրներին հղում անելով, հայտնել էր, որ առկա է երկու փաստաթուղթ, որից մեկը կհրապարակվի, իսկ մյուսը՝ գաղտնի է:
Այսօր պարզ դարձավ, որ ստորագրվելիք փաստաթղթերի մասին տեղյակ չէ նաև արտաքին գործերի նախարարությունը, քիչ առաջ դրա մասին հայտարարեց նաև ԱԳ փոխնախարար Ավետ Ադոնցը:
Լրատվականների կողմից ենթադրյալ փաստաթղթի տարածումից հետ Միքայել Մինասյանը հայտարարեց, որ տարածվող փաստաթղթի տարբերակը հին է, այն երկու անգամ խմբագրվել է, գաղտնի հավելված են տեղափոխվել կետեր, որոնք ավելի վտանգավոր դրույթներ են պարունակում:
Ուստի արդեն իսկ հասկանելի է դառնում իշխանության նպատակները, երբ դաշտ է նետվում փաստաթուղթ, որը տարածվում է հենց իշխանական քարոզչամեքենայի կողմից: Նման քայլերով փորձ է արվում թաքցնել իրական՝ Հայաստանի համար կործանարար պայմաններով գաղտնի փաստաթուղթը:
Աղբյուր՝ AntiFake.am