Մայիսի 26-ին AntiFake.am կայքը գրեց, որ «Բաբաջանյան-Շիրինյան ժողովրդավարների դաշինքը» չի կարողացել գրանցվել ընտրություններին մասնակցելու համար։
«Փաստ-մետրը» ստուգել է և պարզել, որ այս տեղեկությունը սխալ է․ Կենտրոնական ընտրական հանձնաժողովի՝ արտահերթ ընտրություններին մասնակցող կուսակցությունների և դաշինքների ցանկում կա նաև «Բաբաջանյան-Շիրինյան ժողովրդավարների դաշինքը»։
«Փաստ-մետրի» կողմից հրապարակված պարզաբանումներին ամբողջությամբ կարող եք ծանոթանալ հետևյալ հղումով։
Նշենք, որ AntiFake.am-ին մայիսի 27-ին վաղ առավոտյան հաջողվել էր պարզաբանումներ ստանալ մայիսի 26-ին հրապարակված նյութի առնչությամբ, որն էլ ներկայացրել էինք մեր ընթերցողին։
Հիշեցնենք՝ AntiFake.am-ը գրել էր, որ իր տեղեկություններով՝ Կենտրոնական ընտրական հանձնաժողովը չի ընդունել «Բաբաջանյան-Շիրինյան ժողովրդավարների դաշինքի» ընտրական փաստաթղթերը՝ ընտրական ցուցակում թեկնածուների անհրաժեշտ քանակի պակասի պատճառով։
«Դաշինքը ներկայացրել է 47 հոգանոց ցուցակ՝ առնվազն 80-ի փոխարեն։ Փորձեցինք տեղեկությունը ճշտել ԿԸՀ-ից, սակայն մեր զանգերն անպատասխան մնացին։
Փաստորեն Բաբաջանյանն ու Շիրինյանը համատեղ չեն կարողացել ընտրական ցուցակի համար պատգամավորական թեկնածուների անհրաժեշտ թիվ ապահովել»,- գրել էինք մենք։
Պարզաբանումներ ստանալուց հետո AntiFake.am-ն իր ընթերցողներին հայտնել էր, թե ինչն է եղել ընտրական ցուցակի անբավարար թեկնածուների պատճառը։
«Բանն այն է, որ Արման Բաբաջանյանի ու Լևոն Շիրինյանի միջև սուր կոնֆլիկտ է եղել, ինչի պատճառով Շիրինյանը որոշել է, որ իր ղեկավարած «Քրիստոնեա-Ժողովրդավարական» կուսակցությունը պետք է միայնակ մասնակցի ընտրություններին՝ սեփական ընտրական ցուցակով։ Ըստ այդմ էլ՝ Շիրինյանը Կենտրոնական ընտրական հանձնաժողովին 47 թեկնածուներից կազմված ընտրական ցուցակ է ներկայացրել։ Սակայն Արման Բաբաջանյանը հասկացել է, որ իր ու Շիրինյանի՝ ընտրական շեմը հաղթահարելու առանց այն էլ ցածր շանսերը առանձին մասնակցելու դեպքում ավելի են նվազում և հաշտություն է առաջարկել Շիրինյանին։ Բաբաջանյանը կարողացել է համոզել Շիրինյանին, զույգը հաշտվել է և նախապես ծրագրվածին համապատասխան՝ «Շիրինյան-Բաբաջանյան ժողովրդավարների դաշինքը» ԿԸՀ է ներկայացրել արդեն 100 հոգանոց ընտրական ցուցակ։
Դրանով է բացատրվում այն, որ Կենտրոնական ընտրական հանձնաժողովը արտահերթ խորհրդարանական ընտրություններին մասնակցելու համար փաստաթղթեր ներկայացրած կուսակցությունների և դաշինքների ցուցակում ներկայացրել է և՛ Շիրինյանի ղեկավարած «Քրիստոնեա-Ժողովրդավարական» կուսակցության, և՛ «Շիրինյան-Բաբաջանյան ժողովրդավարների դաշինքի» անվանումները»։
Աղբյուր՝ AntiFake.am