Նիկոլ Փաշինյանը իր կողմից հայտարարված «զանգվածային հակահամաճարակային շարժման» շրջանակներում շարունակում է հրապարակել բազմաթիվ լուսանկարներ և տեսահոլովակներ` դատապարտելով մարդկանց առատությունը և սոցիալական հեռավորություն չպահպանելու փաստը: Նիկոլ Փաշինյանը լուսանկարներն ու տեսանյութները տեղադրում է իր բավականին մեծ լսարան ունեցող ֆեյսբուքյան էջում առանց ստուգելու դրանց իսկությունը։ Մենք արդեն իսկ անդրադարձել ենք Փաշինյանի կողմից հրապարակված Panda Ma Li մանկական սրճարանի տեսանյութին, որը նկարված էր հունվարի 8-ին, սակայն վարչապետը հրապարակել էր իր ֆեյսբուքյան էջում որպես հակահամաճարակային կանոնների խախտման «աղաղակող դեպք»։
Այդ շրջանակներում այսօր՝ հունիսի 4-ին, Նիկոլ Փաշինյանը ևս մեկ կեղծ տեղեկություն է տարածել իր ֆեյսբուքյան էջում։ Նա հարսանեկան լուսանկար է հրապարակել` նշելով, որ լուսանկարը արված է Սաղմոսավանքում այսօր:
Փաշինյանի մեղադրանքներին ավելի ուշ պատասխանել է Սաղմոսավանքի հոգևոր հովիվ Տեր Օշին քահանա Հայրապետյանը, ով իր ֆեյսբուքյան էջում գրել է, որ այսօր Սաղմոսավանքում հարսանիք տեղի չի ունեցել:
Քահանա Հայրապետյանը տեղեկացրել է, որ «հարսանիքներ ընդհանրապես թույլ չի տրվում, բացառությամբ աննախադեպ իրավիճակների, որոնց դեպքում անհնար է հետաձգել հարսանիքը։ Ավելին եկեղեցու ներսում ծեսը կատարվում է մեկ քահանայի, հարսի, փեսայի, քավորի ներկայությամբ և ոչ ավելին՝ պահպանելով պարետատան կողմից սահմանված կարգը»:
Անդրադառնալով այս թեմային` Մայր Աթոռի ձեռագրատան, արխիվի և թանգարանների տնօրեն Տեր Ասողիկ քահանա Կարապետյանը նշել է, որ «այնպես, ինչպես մեր Սբ Եկեղեցին է պահպանում հաստատված կարգը, ցավոք, որևէ այլ հաստատություն, կազմակերպություն, հիմնարկություն ևն չի վարվում...
Բաց են, այո, եկեղեցիներն ու իրենց շրջափակը, բայց ծիսակատարությունները կատարվում են օրենքի տառին համապատասխան»:
Պետք է փաստել. Նիկոլ Փաշինյանին «ուղարկված» լուսանկարները չեն ստուգվում, հրապարակվում են կեղծ լուսանկարներ` անվանարկելով տարբեր հաստատությունների, բիզնես գործունեություն իրականացնող ընկերությունների, այս անգամ էլ չշրջանցելով նաև Հայոց եկեղեցուն:
Նշենք, որ նյութը հրապարակելու պահի դրությամբ ապատեղեկատվությամբ ներկայացված լուսանկարը հեռացված չէ վարչապետի ֆեյսբուքյան էջից։
Հեղինակ՝ Մելինե Հայրապետյան
Աղբյուր՝ AntiFake.am