Նիկոլ Փաշինյանը շարունակում է իր «հակահամաճարակային արշավը»` հրապարակելով բազմաթիվ լուսանկարներ Հայաստանի տարբեր բնակավայրերից, որտեղ հիմնականում քաղաքացիները չեն պահպանում հակահամաճարակային կանոնները:
Ինչպես շատ անգամ է եղել, Նիկոլ Փաշինյանի հրապարակած լուսանկարը «ժամկետնանց» էր: Այս անգամ էլ Փաշինյանը անդրադարձել էր «Armenia Planet Tour» տուրիստական գործակալության` հունիսի 1-ին հրապարակված լուսանկարին, որտեղ կազմակերպությունը հրապարակմամբ շնորհավորում էր Երեխաների իրավունքների պաշտպանության օրը:
Ավելի ուշ, «Armenia Planet Tour» տուրիստական գործակալությունը հրապարակման մեկնաբանություններում, այնուհետև իր ֆեյսբուքյան էջում, անդրադառնալով վարչապետի հրապարակմանը, պարզաբանել է, որ լուսանկարը արվել է 2013 թվականին և ինստագրամյան էջում լուսանկարը տեղադրվել է «երեխաների տոնի կապակցությամբ»: Իսկ արդեն Նիկոլ Փաշինյանի էջում առկա հրապարակման մեկնաբանություններում բազմաթիվ օգտատերեր սկզբից ևեթ հարցականի տակ էին դնում լուսանկարի ժամանակային համապատասխանությունը:
Տուրիստական կազմակերպությունը պահանջում է ՀՀ վարչապետ Նիկոլ Փաշինյանից «անհապաղ հեռացնել այդ հաղորդագրությունը»` ափսոսանք հայտնելով, որ երկրի ղեկավարը չստուգված փաստեր է տարածում:
Արձանագրենք. Նիկոլ Փաշինյանը շարունակում է իր էջում տեղադրել լուսանկարներ, որոնց մի մասը խախտում են քաղաքացիների իրավունքները և վնասում են այս կամ այն կազմակերպության կամ բիզնես գործունեություն ծավալող ընկերությունների համբավը:
Փաստենք, որ հրապարակումը դեռևս չի հեռացվել Հայաստանի վարչապետի ֆեյսբուքյան պաշտոնական էջից:
Հեղինակ՝ Մելինե Հայրապետյան
Աղբյուր՝ AntiFake.am
►«Տեսանյութ դիտողը չի՞ տեսել, որ մարդիկ ձմեռային հագուստով են». «Panda Ma Li»-ի հիմնադիրը՝ Փաշինյանի հրապարակած տեսանյութի մասին (ՁԱՅՆԱԳՐՈՒԹՅՈՒՆ)
►Եվս մեկ կեղծ ամսաթվով լուսանկար` հրապարակված Նիկոլ Փաշինյանի կողմից